స్టాక్ మార్కెట్లలో భారీ పతనం... కీలక రంగాల షేర్లు డీలా

ప్రతికూల సంకేతాల మధ్య దేశీయ స్టాక్ మార్కెట్లు మంగళవారం భారీ నష్టాలతో ముగిశాయి. మెటల్, ఇన్ఫర్మేషన్ టెక్నాలజీ (ఐటీ), ప్రభుత్వ రంగ బ్యాంకింగ్ (పీఎస్‌యూ) షేర్లలో వెల్లువెత్తిన అమ్మకాల ఒత్తిడితో సూచీలు కుప్పకూలాయి. రోజంతా ఒడుదొడుకులకు లోనైన మార్కెట్లు చివరికి నష్టాల్లోనే స్థిరపడ్డాయి.

ట్రేడింగ్ ముగిసే సమయానికి బీఎస్ఈ సెన్సెక్స్ 893.39 పాయింట్లు  నష్టపోయి 76,200.68 వద్ద స్థిరపడింది. అదేవిధంగా, ఎన్ఎస్ఈ నిఫ్టీ 278.80 పాయింట్లు పతనమై 23,824.10 వద్ద ముగిసింది. అంతర్జాతీయ మార్కెట్లలో బలహీనతలు దేశీయ ఇన్వెస్టర్ల సెంటిమెంట్‌ను దెబ్బతీశాయి. దీంతో అన్ని రంగాల్లోనూ అమ్మకాలు వెల్లువెత్తాయి. నిఫ్టీలో ఇన్ఫోసిస్, జేఎస్‌డబ్ల్యూ స్టీల్, టీసీఎస్ వంటి షేర్లు ప్రధానంగా నష్టపోయాయి.

రంగాలవారీగా చూస్తే, నిఫ్టీ మెటల్ ఇండెక్స్ 3 శాతానికి పైగా పతనమై అత్యధికంగా నష్టపోయింది. నిఫ్టీ ఐటీ ఇండెక్స్ 2 శాతానికి పైగా క్షీణించగా, పీఎస్‌యూ బ్యాంక్ ఇండెక్స్ కూడా డీలా పడింది. బ్రాడర్ మార్కెట్లోనూ ఇదే ధోరణి కనిపించింది. నిఫ్టీ మిడ్‌క్యాప్ ఇండెక్స్ 1.05 శాతం, స్మాల్‌క్యాప్ ఇండెక్స్ 0.48 శాతం చొప్పున నష్టపోయాయి.

అయితే, ఈ అమ్మకాల హోరులోనూ ఫార్మా, హెల్త్‌కేర్ వంటి రక్షణాత్మక రంగాల షేర్లు మెరుగైన పనితీరు కనబరిచాయి. ఇటీవల మార్కెట్లు లాభపడటంతో ఇన్వెస్టర్లు లాభాల స్వీకరణకు మొగ్గు చూపడం కూడా పతనానికి ఒక కారణమని నిపుణులు విశ్లేషిస్తున్నారు. రుతుపవనాల పురోగతి, అమెరికా-భారత్ వాణిజ్య చర్చలపై ఇన్వెస్టర్లు దృష్టి సారించారని వారు తెలిపారు.